F.A.Q. - COVID-19 an haislech Gewalt

Hëlt d'haislech Gewalt an dëse Krisenzäiten am Zesummenhang mam COVID-19 zou?

Deen am Kader vum Krisenzoustand virgeschriwwene Confinement zwéngt d’Familljen an d’Koppelen aktuell zu engem permanenten, ongewinnten an oft schwieregen Zesummeliewen op enkem Raum. Doduerch klëmmt d’Gefor vu Konflikter a gewalttätegem Verhalen, genee wéi vun der Eskalatioun an der Widderhuelung vu Konflikter a vun haislecher Gewalt (an der Famill an an der Koppel). Rezent Etüden hu gewisen, datt de Confinement tatsächlech an de Famillen an an de Koppele Spannunge provozéiere kann, déi ënner Ëmstänn zu Gewalt féieren – sief et um psychologeschen, physeschen oder sexuelle Plang.

 Gewalt, an all hire Facetten a Formen, gëtt net toleréiert, weder elo nach an Zukunft. Et ass deemno immens wichteg, datt esouwuel all d’Affer (Fra, Mann a Kand) wéi all d’Täter (Mann, Fra) wärend dëser Krisenzäit Zougang zu Hëllef an Ënnerstëtzung hunn.

Stellt de Ministère fir Gläichstellung tëschent Fraen a Männer (MEGA) sécher, datt d'Hëllefs- an Ënnerstëtzungsservicer am Beräich vun der Bekämpfung vun der haislecher Gewalt weider fonctionéieren?

D’Affer sinn net eleng, si kënne sech zu all Moment vun de Strukturen an Déngschter fir d’Afferbegleedung hëllefe loossen. Och Täter(innen) a potenziell Täter(innen) kënne sech zu all Moment vun engem op d’Aarbecht mat Täter spezialiséierte Service hëllefe loossen.

De MEGA huet direkt um Ufank vun der Kris all déi néideg Moossnamen ergraff, fir datt säin Hëllefsreseau am Beräich vun der Bekämpfung vun der (haislecher) Gewalt seng Aktivitéiten assuréiere kann. D’Mesuren, déi d’Regierung am Kader vun der Krisegestioun getraff huet, schreiwen den Hëllefsdéngschter vir, verschidde Schutzmoossnamen ze treffen. Dofir fannen déi meescht Kontakter a Consultatiounen iwwer Telefon, Videokonferenz oder am Kader vu Permanencë statt. D’Coordonnéeë vun de verfügbare Servicer fënnt een um Internet.

Verbitt de Confinement wärend der Krisenzäit enger Persoun, déi Affer vun haislecher Gewalt gëtt oder déi a Gefor ass, d'Haus ze verloossen?

Nee, de Confinement verbitt op kee Fall engem Affer vun haislecher Gewalt oder enger Persoun, déi mat enger Menace oder enger imminenter Gefor konfrontéiert ass, an déi vun enger Persoun, mat där si zesummelieft oder zesummegelieft huet, ausgeet, aus hirem Doheem ze flüchten oder d’Police ze ruffen an en Hëllefsdéngscht unzeruffen.

Gëtt haislech Gewalt gesetzlech bestrooft?

Duerch d’Kris gëtt weder d’Gesetz am Allgemengen nach dat geännert Gesetz vum 8. September 2003 iwwer d’haislech Gewalt am Besonneschen ausser Kraaft gesat. Dëst Gesetz gesäit notamment d’Expulsioun vum Täter/der Täterin vun haislecher Gewalt vir. D’Täter(innen) bleiwen net dovunner verschount, datt dëst Gesetz och an der Krisenzäit ugewant gëtt.

Expulsioun, wat ass dat genee?

Wann d’Police op d’Plaz kënnt, fir am Kader vun enger Situatioun vun haislecher Gewalt an engem Stot ze intervenéieren, da ka si feststellen, datt genuch Indicë virleie fir dovunner auszegoen, datt d’physesch Integritéit vun enger Persoun, mat där den Täter (d’Täterin) an engem familiäre Kader zesummelieft, a Gefor ass oder nees a Gefor ass. Op der Grondlag vun deenen op der Plaz gesammelten Informatiounen an op Uerder vum Parquet kann den Täter (d’Täterin) fir eng Dauer vu 14 Deeg, déi op bis zu dräi Méint verlängert ka ginn, aus der gemeinsamer Wunneng ausgewise ginn an eventuell verbuede kréien, Kontakt mam oder mat den Affer ze hunn, d’Affer ze approchéieren an nees zeréck an d’Haus ze goen.

Wéi kann ee sech am Fall vun enger imminenter Gefor hëllefe loossen?

Wann haislech Gefor imminent a geféierlech ass, sief et fir deen, deen ëm Hëllef freet, wéi fir déijéineg, déi mam Täter (mat der Täterin) an engem familiäre Kader zesummeliewen (z:B. aner Membere vun der Famill oder vun der Famille recomposée), gëtt ëmmer geroden, d’Police um 113 unzeruffen.

Op der mobiler App vun der Police befënnt sech eng Touche fir E-call déi verbonnen ass mam Nationalen Interventionszenter vun der Police via Mobiltelefon oder iwwert dee vun enger SMS op den 113. Fir d‘Sëcherheet vum Uruffer ze assuréiren, gëtt déi geographesch Positioun (nodeems den Accord ageholl gouf) localiséiert fir dem Affer esou schnell wéi méiglech zur Hëllef ze kommen. Fir weider Informatiounen sief op den Internetsite vun der Police verwisen https://police.public.lu/fr/application-mobile.html.

A wéi gëtt d'Affer no der Interventioun vun der Police encadréiert?

Wann nom Agrëff vun der Police eng Expulsioun ordonéiert gëtt, gëtt d’Affer dono vu spezialiséierten Hëllefsdéngschter encadréiert, dat sinn de Service SAVVD fir erwuessen Affer an d’Servicer PSYEA an Alternatives fir mannerjäreg Affer. D’Gesetz vum 8. September 2003 iwwer haislech Gewalt gesäit dëse Bäistand automatesch vir.

Wann et nom Agrëff vun der Police net zu enger Expulsioun koum, iwwergëtt d’Police de Leit, déi am Stot wunnen, eng Informatiounsfiche, déi si opfuerdert, op déi erliefte Situatioun vu Gewalt ze reagéieren a sech hëllefen ze loossen. Op der Fiche sinn d’Servicer uginn, déi erwuessen a mannerjäreg, direkt oder indirekt Affer vu Gewalt en Charge huelen.

Ginn och déi ausgewisen Täter(innen) vun haislecher Gewalt encadréiert?

Et ass wichteg, datt d’Täter(innen) an dëser Kris net sech selwer iwwerlooss sinn. Am Kontext vun enger Expulsioun gesäit dat genannte Gesetz vir, datt den Täter (d’Täterin) sech bannent den éischte 7 Deeg no der Wegweisung beim Service, deen d’Auteure vu Gewalt betreit, dem Riicht Eraus, presentéiere muss. Wann den Täter de Riicht Eraus net kontaktéiert, dann hëlt de Service Riicht Eraus direkt Kontakt mat allen Täter(innen) vun haislecher Gewalt op, fir hinnen eng Prise en charge ze proposéieren.

Wat ass mat den Täter(innen), déi net expulséiert ginn?

De RIICHT ERAUS steet och Täter(innen) zur Verfügung, déi net ausgewise goufen. De Service fuerdert all Persounen, déi spieren, datt den Drock, d’Roserei, d’Konflikter, d’Gewalt an hirer Koppel oder Famill amgaange sinn ze klammen, oder deenen hir Kommunikatiounsfäegkeeten erschöpft sinn, op, sech bei hinnen ze mellen, éier si aktiv a gewalttäteg ginn. Dëse Service riicht sech och u Persounen, déi scho gewalttäteg gi sinn.

Op der Fiche, déi d’Police de Leit aus dem Stot bei hirer Interventioun wéinst haislecher Gewalt aushännegt, fënnt een och d’Servicer, déi d’Auteure vun haislecher Gewalt betreien.

Wat kann ee maachen, wann en Affer oder en(g) Täter(in) d'Police net ruffe wëll? Wéi kommen déi betraffe Persounen un Informatiounen iwwer déi verschidden Handlungsméiglechkeeten?

Nieft deenen uewe genannte Servicer kënnen all d’Affer an all potenziell Gewalttäter(innen) zu all Moment Kontakt mat de Servicer ophuelen, déi am Kader vun der Bekämpfung vu Gewalt, och der haislecher Gewalt, mam Ministère fir Gläichstellung tëschent Fraen a Männer konventionéiert sinn. Déi betraffe Persoune gi vu spezialiséiertem Personal (Psychologen, Assistant-sociallen, Juristen, Kriminologen) bei hiren Demarchë betreit.

ERWUESSEN AFFER

📞 490877-1

VISAVI

(Fraen, déi Affer vu Gewalt goufen)

📞 406001-310

Centre Ozanam
(FMPO)

(Fraen, déi Affer vu Gewalt goufen)

📞 51727288

Espace Femmes
(ProFamilia)

(Fraen, déi Affer vu Gewalt goufen)

📞 545757

LOGIN-Foyer Sud
(CNFL)

(Fraen, déi Affer vu Gewalt goufen)

📞 274965-1

INFOMANN
(ActTogether)

(Jongen a Männer, déi Affer vu Gewalt goufe)

📞 621-858080

UMEDO
umedo.lu

Unité médico-légale de documentation des violences (LNS)

KANNER - JUGENDLECHER - JONK ERWUESSENER

📞 26482050

PSYEA
(Femmes en détresse)

📞 51727289

Alternatives
(ProFamilia)

📞 494149

Oxygène
(Femmes en détresse)

(Meedercher, déi Affer vu Gewalt goufen)

TÄTER(INNEN)

📞 2755-5800

RIICHT ERAUS
(Croix-Rouge)

Eng komplett Lëscht mat alle Servicer a Accueil-Strukturen fënnt een um Site:

violence.lu/aide